PERSONEELNUUS

Vrydag, 1 September, was Loslitdag!  Die Tema was Diversiteit.  Die personeel het op alle maniere Diversiteit uitgebeeld.  Jacobus Maree en sy span het die wenprys ontvang deurdat hulle span van twaalf, vier kulture (Afrikaans, Engels, Zoeloe en Xhosa) van ons land uitgebeeld het.  Daar was selfs maaltye voorgesit en familiestambome opgeplak.  Die HR en Ondersteuningspan het tweede plek behaal en ons Salarisse en Lone Afdeling was in die derde plek.

Elzan Rust (Assistent Rekenmeester) word binnekort ‘n babaseuntjie ryker.  Elzan was op 4 September deur haar kollegas met ‘n Ooievaarstee bederf.

Op 6 September was Sekretaressedag gevier.  Reinet Naudé (Bestuursassistent) en Sunette Broodryk (Ontvangsdame) was met ‘n heerlike ontbyt en bederfpakkie verras.  Op die foto by Reinet en Sunette is Dawie Theron, Riaan Broodryk en Jacobus Maree.

Op 16 September het ‘n hele paar van ons vroulike personeel die Damesontbyt ten bate van Kinderland Kleuterskool bygewoon.  Elsabé Aldrich was die spreker en sy het vir vele skaterlag gesorg.

Met trots kondig ons aan dat ons op 18 September die bekendmaking van twee nuwe Direkteure gevier het.  Santie Oberholzer en Hendrik Rabie het tot onlangs as Rekenkundige Bestuurders opgetree.  Santie werk reeds sedert 1 April 2001 by FHBC en Hendrik is vanaf 5 Oktober 2009 deel van die span.  Beide Santie en Hendrik het deur die jare gewys dat hulle die maatskappy en sy personeel op die hart dra en dat hulle die kliënte en die personeel met toewyding dien.  Die personeel is opgewonde daaroor om met hulle as deel van die Direkteurspan die maatskappy van krag tot krag te neem.  Voorspoed word hulle toegewens met die nuwe rol en verantwoordelikhede.

Op 29 September stap ons saam met die inwoners van Silwerkruin.

Tydens Oktober word personeel weer van kanker bewusgemaak.

16 Oktober vier ons Basedag waartydens ons die Direkteure bedank vir al die geleenthede wat hulle vir ons as personeel bied om te kan deel wees van ‘n maatskappy wat groei en wat in individue investeer.  Hulle leef die waardes van professionalisme, integriteit, etiese optrede en uitnemendheid en inspireer die personeel om ook daarvolgens op te tree om uiteindelik waarde toe te voeg waarokal daar betrokkenheid is.